Би хэн болчхоод байна, хүн байхын хаана нь явна вэ? гэдгээ “ГАМЛЕТ”-аас асуу

Мэдээ мэдээлэл

Би хэн болчхоод байна, хүн байхын хаана нь явна вэ? гэдгээ “ГАМЛЕТ”-аас асуу

Хорвоо дэлхий дээр ганцхан та л тухайн мөчид аймшигтайгаар мэхлэгдсэн юм шиг мэдрэмж төрж байсан уу? Тэгвэл таны сэтгэлийг Гамлет маш сайн ойлгоод зогсохгүй үнэнд хүрэх итгэл найдваргүй болсныг тань ч үл анзааран тэмцэлд уриалан дуудах болно.

Хаан ширээ, эрх мэдэл, эд хөрөнгийн төлөөх увайгүй тэмцэл нь үеийн үед хүн төрөлхтнийг эмгэнэлт байдалд оруулсаар ирсэн. "Гамлет" жүжиг ч бас үүний нэгэн адил. У.Шекспирийн "Гамлет" зохиолын гол зангилаа нь Данийн Ван өөрийн төрсөн дүүдээ хорлогдон хаан ширээ, хань ижил, газар нутгаа алдахад хүрч байгааг маш тодорхой өгүүлнэ.

1600-аад оны сүүлээр бичигдсэн таван бүлэг, 20 үзэгдэлт "Гамлет" жүжгийн үйл явдал Эльсинор шилтгээнд өрнөнө. Улсын Драмын Эрдмийн театр У.Шекспирийн нийт зургаан бүтээлийг тайзнаа амилуулсан ба 1979 онд "Гамлет"-ыг үзэгчидтэйгээ анх уулзуулан "Эрдмийн театр" хэмээх цол авч байжээ.

"Тэнгэрийн салхи тэнгэрлэг царайд нь хүрчих вий гэж хайрладаг байсан аавын минь эхнэр. Цадах тусмаа өлсөх мэт аавд минь дурладаг байсан ээж минь энэ хүн мөн үү" хэмээн худал хуурмагийг жигших Гамлет энэ дэлхий дээр орших уу, эс орших уу?

Ирэх цагийн сайн сайхны төлөө ялагдал сөхрөлөөс айлгүй, цээж тэнэгэр толгой гэдгэр сөрөн тэмцэгчдийн магтуу гэж У.Шекспирийн "Гамлет"-ийг зүгээр ч нэг нэрлээгүй учраас л ийнхүү цаг хугацаа, орон зайг даван хүн ардын итгэл зүтгэлийн очийг бадраан өртөөлдөг биз ээ.

Данийн хунтайж Гамлетын тухай Уильям Шекспирийн эмгэнэлт жүжиг Улсын Драмын Эрдмийн Театрын тайзнаа энэ сарын 25, 26, 27-ны өдрүүдэд 17 цаг дор тоглогдоно.

Цахим тасалбарыг www.TICKET.mn сайтаас...